ВТБ Бірыңғай лигасы 2018/2019
Астана
Астана
ВТБ Бірыңғай Лигасы, Тұрақты біріншілік
23.12.2018, 15:00 Жс
Арена: «Сары-Арқа» велотрегі (Астана)
100:83
Овер тайм
14:20 20:25 22:17 22:16 22:5
Ойын нөмірі: RS-70
Көрермен: 1034
Автодор
Саратов

«Астана» Саратов саңлақтарын қабылдайды

21.12.2018, 20:00    Просмотров: 586
Источник: Баспасөз қызметі
Автор:
Алдағы жексенбіде, яғни 23 желтоқсан күні, елорда баскетбол клубы өз алаңында ВТБ Бірыңғай лигасының 2018/2019 жылдар маусымындағы алтыншы ойынын өткізеді. Бұл жолы «Астана» Саратовтың «Автодор» клубымен додаға түседі.

«Автодор» – Ресейдің ерлер арасындағы кәсіпқой баскетбол клубы, Саратов қаласынан. 1960 жылы құрылған.
 
Жетістіктері:
  • Ресей чемпионатының күміс жүлдегері – 1993/1994, 1996/1997, 1997/1998, 1998/1999
  • Ресей чемпионатының қола жүлдегері – 1995/1996
  • Еуропа кубогының жартылай финалына шыққан – 1997/1998
  • А суперлигасының чемпионы – 1996/1997, 1997/1998
  • Б суперлигасының чемпионы – 2008/2009
  • Суперлига чемпионы – 2013/2014
  • Суперлиганың қола жүлдегері – 2012/2013
 
Өткен кездесулер хроникасы: «Автодор» баскетбол клубы ВТБ Бірыңғай лигасында 2014 жылдан бері ойнап келеді. ВТБ лигасына қосылғанша, саратовтықтар Ресей суперлигасында өнер көрсетіп, бірнеше рет жүлдегер және чемпион атанған. «Астана» – «Автодор» арасындағы екеуара кездесулерге тоқталсақ, екі команда алаңда 8 рет кездесіп, оның 4-еуінде Қазақстан командасы жеңіске жетті. Өткен маусымда Саратов баскетболшыларымен өткен ойындар өте тартысты болып, екеуінде де елордалықтар есе жіберіп алды. Саратовтағы матч шектен тыс шиеленісті өтіп, екі овертаймға созылды. Өкінішке қарай, соңғысында «Автордың» айы оңынан туып, бағы жанды (92:86). Астанада өткен матчта да саратовтықтар жеңіске жетіп, плей-оффқа шықты.

Қазіргі жағдай: Биылғы маусымда Саратов командасының тізгінін Сергей Мокин қолына алған болатын. Бірақ үш рет қатарынан жеңілген соң, «Автодордың» бас бапкерлік қызметін босатып, отставкаға кетті. Қараша айында бас бапкерлік қызметке серб маманы Душан Алимпиевич бекітілді.
Сөз жоқ, команданың көшбасшылары – америкалық легионерлер, сонымен қатар, клубқа жаңадан қосылған серб шабуылшысы Борис Савович. 
 
Турнир кестесі: «Автодор» баскетбол клубы 4 жеңіс және 5 жеңіліспен 7- орынға орналасқан. Ал елорда командасы 9 ойында 6 рет жеңіске жетіп, 4-орынды иеленіп тұр.
 
«Астана» БК бас бапкері Эмиль Райкович: «Автодор» – талантты ойыншылары көп команда. Олар пик-н-роллдарды және оқшаулау («айзо») әдісін көп қолданады. Олардың бас бапкері өзгерді және Польшаның «Зелёна-Гура» командасынан Борис Савович жаңадан қосылды. Соңғы ойындардағы нәтижелеріне қарап, баға берер болсақ, олар қазір спорттық баптарына келген. Алдағы ойында бізге 40 минут бойы қорғаныста да, шабуылда да жоғары қарқында ойнап, ВТБ лигасының Жаңа жыл қарсаңындағы үзілісіне дейінгі маңызды матчта жету қажет болады.

Матч 23 желтоқсан күні «Сарыарқа» велотрегі аренасында өтеді. Басталуы – Астана уақытымен 15:00-де. Билеттердің онлайн сатылымы –Ticketon.kz сайтында.

Матчтың онлайн-трансляциясы біздің сайтымыздың Ойын орталығы бөлімінде және «QazSport» телеарнасы эфирінде жүргізіледі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» «Автодорды» овертаймда омақастырды

23.12.2018, 20:00    Просмотров: 595
Источник: Баспасөз қызметі
Автор:
Бұл матч екі команда үшін де ВТБ лигасының негізгі додасындағы өте маңызды ойын еді. Екі команданың да жеңіске деген жігерліктері адам қызығарлықтай болды. Абырой болғанда, сәті түсіп, алаң иелерінің бақтары жанды.

«Астананың» алғашқы бестігі: Энтони Клеммонс, Максим Марчук, Джей Джей О'Брайен, Джеффри Гросселл, Кеннет Хортон.

Доп ойынға қосылған бетте оны астаналықтар іліп әкетіп, қонақтарының шығыршығын нысанаға алумен болды. Алайда есепті тек үшінші мүмкіндіктерінде ашты. «Автодор» баскетболшылары да қарап қалмай, астаналықтардың шығыршығын дәл көздеді. Бірінші кезең осылай тепе-тең дәрежеде өтті. Алайда осы онминуттықтың соңында қонақтар доға сыртынан екі соққыларын мүлтіксіз орындап, +6 ұпай айырмасымен алға шығып кетті. Райковичтің командасы бір минуттық үзіліс алды. Тайм-ауттан кейін астаналықтар белсенділік танытып, ширақ қимылдады. Бірақ қателіктер де жіберіп алып, қонақтар оны қалт жіберген жоқ. Осылай, бірінші кезең 14:20 есебімен аяқталып, Саратов клубы алда тұрды.

Екінші кезеңде астаналықтар ескертуді көп алмас үшін мейілінше мұқият ойнауға тырысып, ойын тізгінін уыстарынан шығарып алмауды да ойлады. Ал қонақтар айылдарын жияр емес, шабуылдарын сәтті аяқтап, есеп айырмасын +10 ұпайға жеткізді. Ойынның осы ширек бөлігінің соңында астаналықтар бірнеше соққыларын дөп түсіріп, есеп айымасын – 4 ұпайға дейін қысқартты. Алайда, «Астана» қанша тырысқанымен, волгалықтарды қуып жете алмады. Бұл кезеңде де қонақтар басым түсті – 34:45.

Үлкен үзілістен Эмиль Райковичтің шәкірттері көсіле сілтеді. Астаналықтар 5 минуттың ішінде есеп айырмасын – 6 ұпайға дейін қысқартып үлгерді. Үшінші онминуттық шектен тыс шиеленісті өтіп, бетбұрысты болып шықты. «Астана» баскетболшылары матчың осы ширек бөлігінде қайсарлық танытып, қонақтарын қуып жетуге айналды – 56:62.

Соңғы кезең бәрін де орын-орнына қойды. Астаналықтар үшінші минутта есепті теңестіріп (65:65), ойын тізгінін өз қолдарына алды. Әйткенмен, матчтың негізгі уақытында жеңімпаз анықталған жоқ. Алаң иелері ойынды овертаймға созды. Ал қосымша бесминуттықта «Астана» баскетболшылары құйындай орап соғып, қонақтарына ешқандай да мүмкіндік берген жоқ.

Матч «Астана» клубының жеңісімен аяқталды. Есеп – 100:83. Команданы түгелдей ВТБ лигасындағы жетінші жеңісімен құттықтаймыз.



Ең көп ұпай еншілегендер:
  • «Астана»: Джеффри Гросселл (26 + 8 рет доп қағып алды), Энтони Клеммонс (24 + 5 рет доп қағып алды + 9 пас), Кеннет Хортон (19 + 7 рет доп қағып алды), Майкл Дженкинс (15 + 5 пас), Стивен Холт (10 + 6 рет доп қағып алды) 
  • «Автодор»: Тре Голден (19 + 11 пас), Дэвид Кравиш (16 + 8 рет доп қағып алды), Энтони Айрлэнд (13), Борис Савович (10), Перрин Бьюфорд (9 + 11 рет доп қағып алды) 

«Астана» клубының бас бапкері Эмиль Райкович:
— Бірінші кезекте, мен екі командаға да алғыс білдіргім келеді. Өйткені ойын өте тартысты өтіп, овертаймға ұласты. Біз бірінші кезекте жанкештілік танытып, қайсарлықтың үлгісін көрсете білгеніміздің арқасында жеңіске жеттік. Басында ойынымыз үйлеспей қойды, сондықтан үнемі өзіміздің ойын ырғағымызды табуға тырысумен болдық. Ақыр соңында таптық. Бұл жеңіс – жаңа жылдық мерекелер қарсаңында біз үшін өте маңызды. Біз үзіліске көтеріңкі көңіл-күймен шығамыз.

«Автодор» клубының бас бапкері  Душан Алимпиевич:
— Бәрінен бұрын, «Астана» мен оның бас бапкерін құттықтағым келеді. Биылғы маусымда команда өте сапалы ойын өрнегін көрсетіп жүр. Бұл олар үшін үлкен жетістік деп ойлаймын. Біз ойынның екінші бөлігін тым нашар өткіздік. Біріншісімен салыстырғанда, бір деңгейде болған жоқ. Матчтың алғашқы екі ширек бөлігінде сауатты түрде қорғана білдік. Бірақ бізге бәрін талқылап, қайтадан көріп шығып, үлкен үзілістен кейін не болғанын саралау қажет.

«Астана» келесі ойынын енді Жаңа жыл мерекесінен кейін өткзеді. 6 қаңтар күні елорда баскетболшылары Нижний Новгородқа барып, онда осы қаланың өзі аттас баскетбол клубымен ВТБ Бірыңғай лигасының жыл сайынғы чемпионаты аясында додаға түседі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құрылған жылы: 1960 Клубтық түстері: ақ, қара
Мемлекет: Ресей Арена: СС «Кристалл»
Қала: Саратов Сайт: avtodor.ru

Сипаттамасы

«Автодор» – Ресейдің ерлер арасындағы кәсіпқой баскетбол клубы, Саратов қаласынан, 1960 жылы құрылған.
 
Жетістіктері:
  • Ресей чемпионатының күміс жүлдегері – 1993/1994, 1996/1997, 1997/1998, 1998/1999
  • Ресей чемпионатының қола жүлдегері – 1995/1996
  • Еуропа кубогының жартылай финалына шыққан – 1997/1998
  • А суперлигасының чемпионы – 1996/1997, 1997/1998
  • Б суперлигасының чемпионы – 2008/2009
  • Суперлига чемпионы – 2013/2014
  • Суперлиганың қола жүлдегері – 2012/2013